Tudu-tudu ni Sipanganon tanpa "Ulu", Boha do i?

Oleh : Drs. Pantas Sitompul

Tudu-tudu ni sipanganon

Adat ni halak batak, biasana ingkon adong do tudu-tudu ni sipanganon ima na dipasahat susut paranak tu suhut parboru, satu ekor pinahan lobu. Dungi dibalos suhut parboru ma i dohot mangalehon Dengke Mas. Tudu-tudu ni sipanganon i lengkap do i dipatupa di ginjang ni sambong na balga ima NA MARNGINGI, OSANG, ALIANG-ALIANG, SOMBA-SOMBA, SOIT dohot IHUR-IHUR.

Antar songoni ma biasana dipatupa ditingki adong adat di halak batak, isarana ditingki marhata sinamot, ulaon unjuk dohot angka ulaon adat na asing. Dung dipasahat suhut paranak tudu-tudu ni sapanganon i tu suhut parboru, ndang gabe hak ni suhut parboru jagal I sepenuhnya, dipaulak do muse satonga tu suhur paranak ia na digoari Ulu Mulak. Asa adong muse bagi-bagion ni suhut paranak tu hula-hulana dohot tu tulangna suang songoni tu angka undangan na asing. Suhut parboru pe tong do bagi-bagi onna i tu hula-hula dohot tulang na dohot tu angka undanganna na asing. Jala ditingki na pasahaton i tu horong ni hula-hula, tulang dohot angka undangan na asing jolo digorahon do i.

Manjalo tudu-tudu ni sipanganon

Tung mansai uli jala tabo do tahe adat ni halak batak i, masipaolo-oloan. Alai adong do di sebagian halak batak na so adong tudu-tudu ni sipanganon ditingki ulaon pangadation. Adong do nian dipasahat suhut paranak sipanganon tu suhut parboru di bagasan sambong na balga i , alai isini sambong i, ndang adong ulu ni pinahan i na biasana dibola dua. Holan tango-tanggo na bolon do isina. Jala dung sae dipasahat i tu suhut parboru pintor diboan do sude isi ni sambong i tu pudi jala disima dipature parhobas. Dibagi-bagi tu plastic laos dipambagihon situan na torop sesuai aturanna. Antar boha do songon i, boi doi di adat ni halak batak?

Dengke

Angka on ma goar ni jambar juhut (Pinahan Lobu) :

1. Na marngingi (parsanggulan, ulu, kepala bagian atas, tempat otak);

2. Osang (kepala bagian bawah, silojaloja tingki marngalungalu);

3. Aliangaliang (rungkung -somalna diseati do on tingki mangan);

4. Sombasomba (rusuk depan dipotong melingkar tidak putus, unang maponggol);

5. Soit (buhubuhu sian pat); 6. Ihurihur. ***